فیصل آباد میں زہریلی شراب پینے سے 3 نوجوان ہلاک

فیصل آباد میں مبینہ طور پر زہریلی شراب پینے سے تین نوجوان جان کی بازی ہار گئے، جبکہ پولیس نے واقعے کی تحقیقات شروع کر دی ہیں۔

پولیس کے مطابق جاں بحق ہونے والوں کی شناخت شہزاد، ندیم اور عثمان کے ناموں سے ہوئی ہے۔ ایف آئی آر میں بتایا گیا ہے کہ 29 مئی کو نامعلوم افراد رکشے میں آئے اور انہیں شراب فراہم کی۔

رپورٹ کے مطابق شراب پینے کے کچھ ہی دیر بعد تینوں افراد کی طبیعت بگڑ گئی۔ شہزاد اور ندیم 31 مئی کو دم توڑ گئے تھے اور انہیں سپردِ خاک بھی کر دیا گیا، جبکہ عثمان بدھ کے روز دورانِ علاج چل بسا۔

پولیس کا کہنا ہے کہ زہریلی شراب فراہم کرنے والے افراد کی شناخت اور گرفتاری کے لیے تحقیقات جاری ہیں۔