جگن کاظم کی معافی پر علیزے شاہ کا حیران کن ردعمل

معروف میزبان اور اداکارہ جگن کاظم نے ساتھی نوجوان اداکارہ علیزے شاہ سے باضابطہ طور پر معافی مانگ لی ہے۔

سوشل میڈیا پر جاری ایک ویڈیو بیان میں جگن کاظم نے اعتراف کیا کہ بطور سینئر فنکار ان کا رویہ غیر مناسب تھا جس پر انہیں شدید افسوس ہے۔

انہوں نے واضح کیا کہ ان کا مقصد کسی کی دل آزاری کرنا نہیں تھا، تاہم علیزے شاہ کے جذبات مجروح ہونے پر وہ بے حد شرمندہ ہیں۔

یہ معذرت اس وقت سامنے آئی جب اداکارہ علیزے شاہ نے ایک ویڈیو میں الزام عائد کیا کہ ایک تقریب کے دوران گلوکارہ شازیہ منظور نے انہیں دھکا دیا اور جان بوجھ کر گرایا اور اس واقعے پر جگن کاظم کے طنزیہ انداز اپنانے سے وہ دلبرداشتہ ہوئیں۔

علیزے نے یہ بھی کہا کہ انہوں نے ہمیشہ جگن کو ایک سنجیدہ اور عزت دار شخصیت سمجھا تھا، لیکن اس واقعے کے بعد ان کی رائے بدل گئی۔

جگن کاظم نے علیزے سے متعلق سوشل میڈیا پر وائرل ہونے والی میمز اور غیر سنجیدہ تبصروں پر بھی افسوس کا اظہار کیا۔ انہوں نے کہا کہ ایسی حساس خبروں کو مزاح کا موضوع بنانے کے بجائے سنجیدگی سے لینا چاہیے۔

جگن کاظم نے عوام اور میڈیا سے اپیل کی کہ وہ دوسروں کی عزتِ نفس کا خیال رکھیں اور مہذب رویہ اختیار کریں۔