کراچی، 3 روز میں ڈمپر کی ٹکر سے 7 افراد جاں بحق

شہر میں گزشتہ 3 روز کے دوران خونی ڈمپر کی ٹکر کے 3 حادثات میں ہونے والی ہلاکتوں کی مجموعی تعداد 7 ہوگئی ۔

رواں ماہ 5 فروری بروز بدھ  راشد منہاس روڈ میلینئم مال کے قریب خونی ڈمپر سے کچل کر میاں اور بیوی سمیت 3 افراد جاں بحق جبکہ نوجوان زخمی ہوگیا جبکہ 8 فروری بروز ہفتے کو ڈمپر کی ٹکر سے 2 خونی حادثات ہوئے جس میں پہلا جان لیوا حادثہ کورنگی کراسنگ کے قریب پیش آیا.

ریتی بجری سے بھرے ہوئے ڈمپر نے موٹر سائیکل سوار 3 افراد کو روند کر زندگی سے محروم کر دیا جبکہ ہفتے کی شب اسٹیل ٹاؤن موڑ کے قریب ڈمپر نے ایک اور موٹر سائیکل کو روند ڈالا جس میں زخمی ہونے والے 2 افراد میں سے ایک شخص جاں بحق ہوگیا جبکہ دوسرے کو طبی امداد فراہم کی جا رہی ہے۔