کراچی میں 24 گھنٹے کے لیے کن علاقوں میں گیس کی سپلائی بند رہے گی؟

سوئی سدرن گیس کمپنی نے ایک بیان میں بتایا ہے کہ کراچی کے متعدد علاقوں میں گیس کی سپلائی 24 گھنٹے کے لیے معطل رہے گی۔

یہ اقدام جام صادق میں گیس کی پائپ لائن پر مرمت کے کام کے باعث کیا جا رہا ہے۔ یہ بندش 10 اگست، اتوار کی رات 10 بجے سے شروع ہو کر 11 اگست، پیر کی رات 10 بجے تک جاری رہے گی۔

اس دوران متاثر ہونے والے علاقوں میں ڈی ایچ اے فیز ون، ڈیفنس ویو، اختر کالونی، اعظم بستی، قیوم آباد اور کلفٹن کے بلاکس 3، 5 اور 6 شامل ہیں۔

ترجمان نے صارفین سے کہا ہے کہ وہ اس دوران پیش آنے والی تکلیف کے لیے متبادل انتظامات کر لیں۔