لاہور سے خاتون مذہبی اسکالر کا بیٹا لاپتہ

لاہور ہائی کورٹ میں معروف مذہبی اسکالر ڈاکٹر نگہت ہاشمی کے بیٹے محمد بن خالد کی بازیابی سے متعلق دائر درخواست پر سماعت ہوئی، جس میں عدالت نے پولیس کو ہدایت کی کہ آئندہ پیشی پر مغوی کو برآمد کر کے عدالت میں پیش کیا جائے۔

جسٹس اسجد جاوید گھرال نے محمد بن خالد کی اہلیہ حجاب یزدانی کی جانب سے دائر درخواست کی سماعت کی اور کیس کی مزید کارروائی 5 جنوری تک ملتوی کر دی۔

سماعت کے دوران درخواست گزار کی نمائندگی بیرسٹر میاں علی اشفاق نے کی، جبکہ ڈی ایس پی برکی بھی عدالت میں پیش ہوئے۔

درخواست گزار کے وکیل نے مؤقف اختیار کیا کہ محمد بن خالد کو 24 اور 25 نومبر کی درمیانی شب مبینہ طور پر اغوا کیا گیا تھا، تاہم تاحال اس کا سراغ نہیں لگایا جا سکا۔

اس پر عدالت نے ڈی ایس پی سے سوال کیا کہ اتنے وقت گزرنے کے باوجود مغوی کی بازیابی کیوں ممکن نہیں ہو سکی۔

ڈی ایس پی برکی نے عدالت کو آگاہ کیا کہ پولیس کی متعدد ٹیمیں مختلف پہلوؤں سے تفتیش کر رہی ہیں اور جلد پیش رفت متوقع ہے، جس پر عدالت نے پولیس کو مزید مہلت دیتے ہوئے آئندہ سماعت پر واضح نتائج پیش کرنے کی ہدایت کی۔