شکار پور میں سابق ایم پی اے کو لوٹنے کی کوشش، ڈاکوؤں کی فائرنگ سے 2 محافظ جاں بحق

سندھ کے ضلع شکار پور میں ڈاکوؤں نے سابق ایم پی اے غالب خان ڈومکی کی گاڑی پر فائرنگ کی جس کے نتیجے میں وہ زخمی جبکہ دو محافظ ہلاک ہوگئے۔

تفصیلات کے مطابق شکارپور کے قریب رستم تھانے کی حدود صفدر لاڑو کے مقام پر واقعہ پیش آیا، سابق ایم پی اے گاڑی پر سکھر سے اپنی آبائی گاؤں کندہ کوٹ کی طرف جارہے تھے۔

پولیس کے مطابق 10 سے زائد مسلح ڈاکوؤں  نے لوٹنے کے غرض سے گاڑی کو روکنے کی کوشش کی اور نہ رکنے پر فائرنگ کردی، جس پر گارڈز نے جواب دیا جس میں ایک ڈاکو ہلاک ہوگیا جبکہ ملزمان کی فائرنگ سے دو گارڈ ہلاک ہوگئے۔

ڈاکیوں کی فائرنگ سے غالب خان ڈومکی زخمی ہوئے جنہیں زخمی حالت میں سکھر اسپتال منتقل کردیا گیا،

اُدھر بلاول بھٹو نے واقعے کا نوٹس لے کر وزیراعلیٰ سندھ سے رپورٹ طلب کرلی جبکہ وزیر اعلیٰ نے وزیرداخلہ اور وزیر داخلہ ضیا الحسن لنجار نے ایس ایس پی شکار پور سے رپورٹ طلب کرلی۔