سوات میں سیاحوں کی کشتی کو حادثہ، 5 جاں بحق، تین لاپتہ

خیبرپختونخوا کے مالاکنڈ ڈویژن کی وادی کالام کے سیاحتی مقام پر سیاحوں کی کشتی کو حادثہ پیش آیا ہے۔

تفصیلات کے مطابق کالام سے تقریبا چار گھنٹے کی مسافت پر واقع جھیل سیف اللہ میں سیاحوں کی کشتی عدم توازن کی وجہ سے الٹ گئی۔ کشتی میں ایک ہی خاندان کے 8 افراد اور ملاح سوار تھا۔

جھیل کا پانی اس قدر تیز تھا کہ کسی کو بھی سنبھلنے کا موقع نہ ملا اور تمام سیاح بہہ گئے جبکہ تیراکی اور مقامی افراد نے فوری اقدامات کرتے ہوئے ملاح کو شدید زخمی حالت میں ریسکیو کرلیا۔

ڈوبنے والے سیاحوں میں سے 5 کی لاشیں وقوعہ سے دو گھنٹے کی دوری پر واقع مہوڈنڈ کے مقام سے ملیں جبکہ تین کی تلاش جاری ہے۔

ذرائع کے مطابق حادثے کا شکار فیملی کا تعلق پنجاب سے تھا تاہم اس کی ابھی حتمی تصدیق نہیں ہوسکی ہے۔ دیگر لاپتہ سیاحوں کی تلاش کیلیے ریسکیو اور مقامی افراد کا آپریشن جاری ہے۔