بابر اعظم اور رضوان بھی مودی حکومت کی بوکھلاہٹ کی زد میں آگئے

بھارتی حکومت نے پہلگام حملے پر بابر اعظم اور محمد رضوان کو بھی زد پر لے لیا۔

تفصیلات کے مطابق پہلگام حملے کے بعد اپنی فوجی ناکامی چھپانے اور پاکستان پر الزامات لگانے کی کوششوں کے ساتھ ساتھ بھارت نے اب پاکستانی کرکٹرز کے سوشل میڈیا اکاؤنٹس بلاک کرنا شروع کر دیے ہیں۔

رپورٹ کے مطابق بھارت میں کپتان محمد رضوان، سابق کپتان بابر اعظم کا انسٹاگرام اکاؤنٹ بھی بند کردیا گیا ہے۔

اس سے قبل شاہد آفریدی کا یوٹیوب چینل جبکہ راشد لطیف، شعیب اختر اور باسط علی کے یوٹیوب چینلز  بھی بھارت میں بلاک کیے گئے ہیں۔

میڈیا رپورٹس کے مطابق بھارتی وزارت داخلہ کی سفارش پر کل 16 پاکستانی یوٹیوب چینلز بلاک کیے گئے ہیں۔ ان میں 3 سابق پاکستانی کرکٹرز کے چینلز بھی شامل ہیں۔

بھارتی حکام کا کہنا ہے کہ یہ اقدام "قومی سلامتی" کے تحفظ کے لیے اٹھایا گیا ہے۔ خاص طور پر شاہد آفریدی کے چینل کو بلاک کرنے کی وجہ ان کے "دو ٹوک بیانات" بتائے جا رہے ہیں۔

پاکستانی کرکٹ فیڈریشن نے اس اقدام کو "فکری دہشت گردی" قرار دیتے ہوئے کہا ہے کہ یہ کھیلوں کو سیاست میں گھسیٹنے کی ناکام کوشش ہے۔ سوشل میڈیا صارفین نے بھی بھارت کے اس اقدام کی شدید مذمت کی ہے۔