بابر اعظم ورلڈ کلاس کھلاڑی ہے اور جلد بھرپور کم بیک کرے گا، آسٹریلوی کوچ

مشہور آسٹریلوی پاور ہٹنگ کوچ شینن ینگ نے پاکستانی وائٹ بال کے کپتان بابر اعظم کی شاندار بلے بازی کی صلاحیتوں کا اعتراف کرتے ہوئے اُن کیلیے نیک خواہشات کا اظہار کیا ہے۔

اسٹار بلے باز نے T20 فارمیٹ میں پاور شاٹس کے لیے ضروری مہارتوں کے بارے میں مشورہ لینے کے لیے ینگ سے ملاقات کی۔ آسٹریلوی کوچ نے کہا کہ بابر اعظم ورلڈ کلاس کھلاڑی ہیں اور وہ بھرپور انداز سے واپسی کریں گے۔

ینگ نے کہا کہ ’ہم بابر اعظم کی حمایت کرتے ہیں اور اس بات سے کوئی انکار نہیں کہ وہ ورلڈکلاس بلے باز تھا اور دوبارہ جلد عالمی منظر نامے پر ابھرے گا، میں سوچتا ہوں کہ بعض اوقات پاکستان شائقین توقعات سے زیادہ کی امید کرتے ہیں اس وجہ سے بھی کھلاڑیوں پر پریشر آتا ہے۔

کوچ نے مزید کہا کہ "بابر بہت اچھا آدمی ہے اور اکیڈمی کے ساتھ بہت اچھا کام کر رہا ہے"۔ انہوں نے مزید کہا، "وہ نوجوان لڑکوں کو ایک موقع فراہم کر رہا ہے جو کہ قابل تعریف اور لاجواب ہے۔"

واضح رہے کہ حال ہی میں 29 سالہ کرکٹر ٹی 20 ورلڈکپ میں بطور بلے باز اور کپتان کے طور ناکام نظر آئے تھے جس پر انہیں تنقید کا نشانہ بھی بنایا گیا تھا۔