بنگلادیش میں لگا تھا کہ اسپن وکٹ ہو گی مگر وہاں فاسٹ بولرز کو مدد ملی، صائم ایوب

 فلو ریڈا: پاکستان کرکٹ ٹیم کے بیٹر صائم ایوب نے کہا ہے کہ بنگلادیش میں لگا تھا کہ اسپن وکٹ ہوگی مگر وہاں فاسٹ بولرز کو مدد ملی۔

میچ کے بعد میڈیا سے گفتگو کرتے ہوئے انہوں نے کہا کہ لاڈرہل کی پچ خشک ہے، یہاں اسپنرز کو مدد ملی، اگلے میچز میں بھی اگر وکٹ ایسی رہی تو اسپنرز کو کافی مدد ملے گی۔

صائم ایوب نے کہا کہ اس طرح کی چیلنجنگ وکٹ پر تسلسل کے ساتھ شاٹس نہیں لگتے، نئے آنے والے بیٹرز کے لیے کھیلنا مشکل تھا۔

انہوں نے کہا کہ فخر زمان کے ساتھ یہی پلان کیا تھا کہ ٹائم لیں گے، پلان کیا کہ غیرضروری شاٹس کھیلنے سے گریز کریں۔انہوںنے کہاکہ ہمارا کمبی نیشن اچھا بنا، صورتِ حال کے مطابق کوئی بھی کھلاڑی کھیل سکتا ہے۔

واضح رہے کہ پاکستان نے 3 ٹی ٹوئنٹی میچز کی سیریز کے پہلے میچ میں ویسٹ انڈیز کو 14 رنز سے شکست دے دی ہے۔پاکستان کے 179 رنز کے ہدف کے جواب میں ویسٹ ایڈیز کی ٹیم مقررہ 20 اوورز میں 7 وکٹوں کے نقصان پر 164 رنز بناسکی۔