چیمپئنز ٹرافی، پڑوسی ملک نے یونس خان کی خدمات حاصل کرلیں

پاکستان کے سابق کپتان یونس خان کو 19 فروری سے کراچی میں شروع ہونے والی آئی سی سی چیمپئنز ٹرافی 2025 کے لیے افغانستان کرکٹ ٹیم کا مینٹور مقرر کیا گیا ہے۔

 افغانستان کرکٹ بورڈ (اے سی بی) کے ترجمان سعید نسیم سادات نے خبر کی تصدیق کرتے ہوئے کہا کہ یونس خان کو اس باوقار ٹورنامنٹ کے لیے ٹیم کی مینٹرنگ کی ذمہ داری سونپی گئی ہے۔ توقع ہے کہ وہ چیمپئنز ٹرافی سے قبل اسکواڈ میں شامل ہو جائیں گے۔

 یونس خان اس سے قبل 2022 میں افغانستان کی ٹیم کے بیٹنگ کوچ تھے۔

 اپنے بین الاقوامی کوچنگ کے تجربے کے علاوہ، انہوں نے پاکستان سپر لیگ (پی ایس ایل) میں پشاور زلمی اور ابوظہبی ٹی 10 لیگ میں بنگلہ ٹائیگرز کے ساتھ بھی کام کیا ہے۔

 قابل ذکر ہے کہ یونس خان کی کپتانی میں پاکستان نے 2009 کے T20 ورلڈ کپ میں تاریخی فتح حاصل کی۔

 آٹھ ٹیموں پر مشتمل اس ٹورنامنٹ میں 15 میچز کھیلے جائیں گے اور یہ پورے پاکستان اور دبئی میں کھیلے جائیں گے۔