معروف ایم ایم اے فائٹر نے اسلام قبول کرلیا

معروف امریکی اور روسی مکسڈ مارشل آرٹسٹ (ایم ایم اے) فائٹر جیف مونسن نے اسلام قبول کرلیا۔

قبول اسلام کے حوالے سے باقاعدہ تقریب ماسکو میں 20 جون کو ہوئی تاہم اس کی تفصیلات اب سامنے آئی ہیں۔ ایک ویڈیو میں دکھایا گیا ہے کہ مونسن کلمہ پڑھ کر دائرہ اسلام میں داخل ہورہے ہیں اور وہ بہت زیادہ خوش بھی ہیں۔

ایک اور ویڈیو میں مونسن کو فلسطینی پرچم پہنے دیکھا گیا اور ان کی آنکھیں آنسوؤں سے بھری ہوئی تھیں، جب اس نے اسلام قبول کرنے کے اپنے فیصلے کا اظہار کیا۔

انہوں نے بتایا کہ ’میں اپنے پورے ہوش و ہواس میں اسلام قبول کررہا ہوں اور اس مشکل وقت میں اپنے بھائیوں کے کاندھے سے کاندھا ملا کر ساتھ کھڑا ہوں، میں اس کے بارے میں بہت سوچ رہا ہوں، لیکن یہ ایک فیصلہ کن قدم ہے‘۔

واضح رہے کہ جیف مونسن نے کیئریئر میں اب تک 60 مقابلوں میں فتح حاصل کی جبکہ انہیں 26 میں شکست اور ایک مقابلہ برابر رہا تھا۔ اس سے قبل انہیں امریکی شہریت کی پیش کش کی گئی تھی تاہم انہوں نے وہ مسترد کر کے روس میں ہی سکونت اختیار کی تھی۔