پاکستان نے کشتی رانی کے مقابلوں میں 14 میڈلز جیت لیے

پاکستان کی روئنگ ٹیم نے تھائی لینڈ کے شہر پٹایا میں 26 سے 31 مئی تک منعقدہ ایشین انڈور روئنگ چیمپئن شپ میں شاندار کارکردگی کا مظاہرہ کرتے ہوئے کل 14 میڈلز اپنے نام کرلیے۔

پاکستانی ٹیم نے 10 سونے، 3 چاندی اور 1 کانسی کا تمغہ جیتا۔

20 رکنی پاکستانی اسکواڈ نے ماسٹرز، انڈر 23 اور اوپن ڈویژنز سمیت مختلف کیٹیگریز میں خطے کے بہترین کھلاڑیوں کے خلاف مقابلہ کیا۔

 طاقت اور تکنیک کے انمٹ مظاہرے کے ساتھ پاکستان نے مجموعی طور پر تیسری پوزیشن حاصل کی، جبکہ میزبان ملک تھائی لینڈ پہلی اور بھارت دوسرے نمبر پر رہا۔  

 ایونٹ میں اسد علی نے سب سے زیادہ نمایاں کارکردگی دکھاتے ہوئے پانچ طلائی تمغے جیتے۔

 ولی خان نے دو سونے کے تمغوں کے ساتھ اہم کردار ادا کیا، جبکہ عبدالجبار اور محمد شہزاد نے ایک ایک سونے اور چاندی کا تمغہ حاصل کیا۔