پاکستانی کھلاڑی نے آسٹریلیا میں کرکٹ اکیڈمی کھول لی

قومی کرکٹ ٹیم کے بلے باز فخر زمان نے آسٹریلیا کے شہر میلبرن میں اکیڈمی قائم کردی۔

دورہ نیوزی لینڈ مکمل ہونے کے بعد فخر زمان آسٹریلیا کے شہر میلبرن پہنچے جہاں انہوں نے اکیڈمی کے افتتاح کے لیے تھوڑے دن قیام بھی کرلیا۔

بدھ کے روز فخر زمان نے ملیبرن میں قائم کرکٹ اکیڈمی کا افتتاح کیا، تقریب میں بچوں کی بڑی تعداد نے شرکت کی۔

انہوں نے کہا کہ اکیڈمی میں داخلے کے لیے عمر کی کوئی حد نہیں، اس کے قیام کا مقصد کھلاڑیوں کو بنیادی چیزیں فراہم کر کے ٹیم تیار کرنا ہے۔

انہوں نے کہا کہ آسٹریلیا ، دبئی اور پاکستان سے اکیڈمی  کی ٹیمیں دوروں کا تبادلہ کریں گی ، پاکستان میں دو اکیڈمیز قائم کر چکے ہیں ، ایک اور پر کام جاری ہے۔

فخر زمان نے کہا کہ میں نے بڑی مشکل سے کرکٹ کھیلی ہے، اب چاہتا ہوں دوسروں کو مشکل نہ ہو۔