پی سی بی میں تقرری، جاوید میانداد نے نیا پینڈورا باکس کھول دیا

قومی کرکٹ ٹیم کے سابق کپتان اور لیجنڈری کرکٹر جاوید میانداد نے نگراں وزیراعلیٰ کی پی سی بی مینجمنٹ کمیٹی کی تقرری کے بعد نیا پینڈورا باکس کھول دیا۔

انہوں نے اپنے بیان میں کہا کہ پوری دنیا میں کرکٹ کے حوالے سے ایسا نہیں ہوتا جیسا کہ پاکستان میں ہوتا ہے، کرکٹ کے فروغ کیلئے کام کرنا ہوگا۔

کراچی میں میڈیا سے گفتگو کرتے ہوئے جاوید میانداد نے کہا کہ جو بھی وزیراعظم بنے، اسے ملک اور کرکٹ  کی ترقی کیلئے کام کرنا چاہیے مگر ایسا ہوتا ہے کہ جس کی حکومت آجائے وہ ہی پاکستان کرکٹ بورڈ میں اپنے پسندیدہ افراد  لیکر آتا ہے۔

جاوید میانداد نے کہا کہ اگر مجھے پی سی بی کا اختیار مل جائے تو سب ٹھیک کردوں گا، جیسے میں نے ماضی میں پاکستان کرکٹ ٹیم کی کوچنگ کی اور ان کو کرکٹر بنادیا جن کو کرکٹ کا پتہ ہی نہیں تھا۔

ایک سوال کے جواب میں لیجنڈری کرکٹر نے یہ بھی کہا کہ وہ اپنی خدمات کیلیے تیار ہیں مگر اس کے ساتھ ہی انہوں نے یہ کہا کہ ’پیاسا کنویں کے پاس آتا ہے، کنواں پیاسے کے پاس نہیں جاتا‘۔