شاداب خان اسپتال میں داخل، اہم آپریشن ہوا

قومی کرکٹ ٹیم کے آل راؤنڈر شاداب خان اسپتال میں داخل ہیں جہاں اُن کے کاندھے کی سرجری ہوئی ہے۔

شاداب خان نے اپنی طبیعت اور سرجری کے حوالے سے خود ہی مداحوں کو آگاہ کیا اور بتایا کہ اللہ کا شکر ہے اُن کے کاندھے کا آپریشن کامیاب رہا ہے۔

شاداب کے مطابق اب وہ صحت یابی کی طرف گامزن ہے اور کچھ روز آرام کر کے دوبارہ کرکٹ کے میدان میں آنے کیلیے ٹریننگ کا آغاز کریں گے۔

آل راؤنڈر کے اچانک انکشاف پر پہلے تو مداح حیران ہوئے اور پھر انہوں نے کامیاب آپریشن پر شکر ادا کرتے ہوئے شاداب خان کیلیے نیک خواہشات و جلد صحت یابی کی دعا کی۔

یاد رہے کہ شاداب خان انجری کے باعث قومی ٹیم سے باہر ہیں اور انکی واپسی میں 2 سے 3 ماہ کا وقت لگ سکتا ہے۔