بھارت میں عید میلاد النبی ﷺ کے جھنڈے لگانے پر فسادات، مسلمان گرفتار

بھارت میں عید میلاد النبی کے سلسلے میں جھنڈے لگانے پر ہندو انتہا پسند آگ بگولہ ہوئے اور پھر دو علاقوں میں مسلم کش فسادات پھوٹ پڑے۔

بھارتی میڈیا کے مطابق ریاست گجرات کے شہر بھروچ اور سورت میں عید میلاد النبی کے جھنڈے لگانے پر مشتعل انتہا پسندوں نے مسلم آبادیوں پر حملے کیے اور موٹرسائیکلوں سمیت متعدد املاک کو نذر آتش کیا۔

ہندو انتہا پسندوں کے حملوں اور تشدد سے خواتین اور بچوں سمیت کئی لوگ زخمی ہوئے جبکہ ان پرچموں کو اتار کر نذر آتش اور توہین کی گئی۔ مشتعل افراد نے اپنے مذہبی نعرے لگا کر مسلمانوں کو چیلنج بھی کیا۔

جھنڈے اتارنے پر مسلمانوں میں غم و غصے کی لہر دوڑ گئی تاہم پولیس نے جانبداری کا مظاہرہ کرتے ہوئے انتہا پسندوں کے خلاف کارروائی کے بجائے مسلمانوں کو احتجاج سے روکا اور ظلم کے خلاف آواز بلند کرنے پر گرفتاریاں کیں۔

مسلم آبادی اور رہنماؤں کے مطابق پولیس نے احتجاج 27 افراد کو حراست میں لیا گیا ہے جن میں اکثریت مسلمانوں کی ہے۔