غزہ میں دلخراش واقعہ، انسانی بحران پیدا ہونے کا خدشہ

اسرائیلی بربریت سے تباہ ہونے والے فلسطین کے علاقے غزہ میں دلخراش اور انسانیت سوز واقعہ پیش آیا ہے جس کے باعث بڑے بحران کا خدشہ ظاہر کیا جارہا ہے۔

اے ایف پی کے مطابق فلسطینی پناہ گزینوں کے لیے اقوام متحدہ کے ادارے کی سینیئر ایمرجنسی افسر لوئیس واٹریج نے بتایا کہ غزہ میں فلسطینیوں کے لیے جانے والے 109 امدادی ٹرکوں پر مسلح افراد نے حملہ کر کے سارا سامان لوٹ لیا جبکہ ڈرائیور اور عملے کو زخمی کردیا۔

انھوں نے مزید بتایا کہ انروا اور ورلڈ فوڈ پروگرام کی جانب سے فراہم کردہ خوراک لے جانے والے قافلے کو اسرائیل نے مختصر نوٹس پر کیرم شلوم بارڈر کراسنگ کے ایک غیرمعروف راستے سے روانہ ہونے کی ہدایت کی تھی۔ لوئیس واٹریج نے کہا کہ غزہ کے متعدد راستے ناقابل رسائی ہیں۔ نامعلوم حملہ آور 100 کے قریب امدادی سامان سے لدے ٹرک لے کر فرار ہوگئے۔

تاحال امدادی سامان کو لوٹنے والے حملہ آوروں کا سراغ نہیں لگایا جا سکا۔ ادھر غزہ میں حماس کی وزارت داخلہ کے ذرائع نے بتایا کہ قبائلی کمیٹیوں کی مدد سے امدادی ٹرکوں کی لوٹ مار میں ملوث گینگ کے 20 سے زائد افراد ایک کارروائی میں ہلاک کردیا گیا۔