امریکی تجاویز مسترد، ایران نے اپنی شرائط پیش کردیں

ایران نے جنگ بندی کیلیے امریکا کی جانب سے پیش کی گئی تجاویز کو مسترد کرتے ہوئے جنگ بندی کے لیے اپنی شرائط واضح کر دی ہیں۔

ایرانی میڈیا کے مطابق حکام کا کہنا ہے کہ امریکی تجاویز کا تفصیلی جائزہ لینے کے بعد انہیں غیر مناسب قرار دیا گیا۔ ایران کا مؤقف ہے کہ جنگ بندی صرف اسی صورت ممکن ہوگی جب اس کی طے کردہ شرائط اور ٹائم لائن کو تسلیم کیا جائے۔

ایرانی حکام نے بتایا کہ جنگ بندی کے لیے پانچ بنیادی نکات رکھے گئے ہیں، جن میں سب سے اہم شرط یہ ہے کہ ایران کے خلاف جاری تمام فوجی کارروائیاں مکمل طور پر بند کی جائیں۔ دوسری شرط کے طور پر مستقبل میں کسی بھی ممکنہ جارحیت سے بچاؤ کے لیے مؤثر اور قابلِ عمل نظام کی تشکیل کا مطالبہ کیا گیا ہے۔

تیسری شرط میں جنگ کے دوران ہونے والے نقصانات کے ازالے اور معاوضے کی واضح ضمانت شامل ہے، جبکہ چوتھی شرط کے تحت پورے خطے میں جاری تمام محاذوں پر لڑائی کے خاتمے کی بات کی گئی ہے، جس میں مختلف اتحادی گروہوں کو بھی شامل کیا گیا ہے۔

پانچویں شرط کے طور پر ایران نے آبنائے ہرمز سے متعلق اپنے خودمختار اختیار کو بین الاقوامی سطح پر تسلیم کرنے اور اس کی ضمانت دینے کا مطالبہ کیا ہے۔

ایرانی حکام کا کہنا ہے کہ ان شرائط کی تکمیل کے بعد ہی جنگ بندی پر غور کیا جائے گا۔ انہوں نے الزام عائد کیا کہ ماضی میں ہونے والے مذاکرات میں بھی ایران کو دھوکہ دیا گیا اور امریکا نے سنجیدہ مذاکرات کے بجائے فوجی کارروائی کا راستہ اختیار کیا۔

حکام نے مزید کہا کہ جب تک ان کے مطالبات پورے نہیں ہوتے، ایران اپنی دفاعی کارروائیاں جاری رکھے گا۔