آپریشن سندور میں ناکامی اور رافیل تباہ ہونے پر بھارتی ایئرفورس پر اعلی سطح پر تبادلے

نئی دہلی: بھارتی فضائیہ کے نائب سربراہ ایئر مارشل ایس پی دھرکر کو ان کے عہدے سے ہٹا دیا گیا ہے، جو صرف سات ماہ قبل ہی اس پوزیشن پر تعینات ہوئے تھے۔

یہ فیصلہ بھارتی فضائیہ کی جانب سے رافیل طیاروں کو مؤثر طریقے سے استعمال کرنے میں ناکامی کے بعد لیا گیا ہے۔  

ذرائع کے مطابق، بھارتی رافیل طیارے مقبوضہ کشمیر کے فضائی حدود میں گشت کر رہے تھے، لیکن پاک فضائیہ (پی اے ایف) کی جانب سے بروقت جوابی کارروائی کے بعد انہیں پیچھے ہٹنا پڑا۔

اس واقعے نے بھارتی فضائیہ کی کارکردگی پر سوالیہ نشان کھڑے کر دیے ہیں۔   ذرائع نے بتایا کہ بھارتی رافیل طیارے پاکستانی جدید ریڈار سسٹمز کے سامنے بے بس ہو گئے۔ وہ کنٹرول لائن (ایل او سی) کے قریب جارحانہ طور پر گشت کر رہے تھے، لیکن پاکستانی ریڈارز نے انہیں جام کر دیا جس کے بعد انہیں فرار ہونا پڑا۔

یہ پی اے ایف کی جانب سے ایک اور "آپریشن سوئفٹ ریٹارٹ" جیسی کارروائی تھی۔  

اس ناکامی کے بعد بھارتی حکومت نے دھرکر کی جگہ نرم دیشور تیواری کو نائب سربراہ مقرر کیا ہے تاکہ فضائیہ کے اندر بہتر ہم آہنگی پیدا کی جا سکے۔

یہ دوسرا بڑا فوجی ردوبدل ہے جبکہ اس سے قبل پہلگام جعلی پرچم آپریشن کے بعد نارتھرن کمانڈ کے کمانڈر لیفٹیننٹ جنرل ایم وی سوچندر کمار کو بھی ہٹا دیا گیا تھا، جنہوں نے پاکستان پر فوری جارحیت سے انکار کر دیا تھا۔  

یہ واقعہ اس وقت پیش آیا جب وزیر اطلاعات عطاء اللہ تارڑ نے خبردار کیا تھا کہ بھارت اگلے 24 سے 36 گھنٹوں میں پاکستان پر فوجی کارروائی کرنے کی منصوبہ بندی کر رہا ہے۔

اگرچہ نئی دہلی نے ابھی تک اسلام آباد کے الزامات کا سرکاری طور پر جواب نہیں دیا، لیکن حالات نے دونوں ممالک کے درمیان کشیدگی کو مزید بڑھا دیا ہے۔  

فوجی قیادت میں تیزی سے ہونے والی تبدیلیاں بی جے پی حکومت کے ایجنڈے اور فوجی خودمختاری کے درمیان بڑھتے ہوئے عدم اعتماد کی عکاسی کرتی ہیں۔

ماہرین کا کہنا ہے کہ یہ اقدامات بھارتی فوجی اداروں کے اندر پائی جانے والی بے چینی کو ظاہر کرتے ہیں۔   ابھی تک بھارتی حکومت کی طرف سے اس معاملے پر کوئی سرکاری بیان جاری نہیں کیا گیا ہے، لیکن پاکستان نے اپنی فضائی حدود کے تحفظ کا عزم دہرایا ہے۔