سعودی عرب نے پاکستان کیلیے نئی ویز پالیسی جاری کردی، پابندی کا اطلاق

سعودی عرب نے ایک نئی ویزا پالیسی متعارف کرائی ہے، جس کے تحت پاکستان سمیت 14 ممالک کے لیے ایک سال کی مدت کے ملٹی پل انٹری ویزا کی سہولت کو معطل کر دیا گیا اور اب صرف سنگل انٹری ویزے جاری کیے جائیں گے۔

نئی پالیسی کا مقصد:

سعودی حکام کے مطابق اس اقدام کا مقصد ان افراد کو روکنا ہے جو طویل المدتی ویزے کا استعمال کرتے ہوئے غیر قانونی طور پر حج ادا کرتے ہیں اور سرکاری حج کوٹے کو نظرانداز کرتے ہیں۔

نئی پالیسی کا اطلاق کب سے ہوگا؟

نئی پالیسی کا اطلاق یکم فروری 2025 سے ہو گیا ہے۔ اس کا اطلاق پاکستان، بھارت، بنگلادیش، الجزائر، مصر، ایتھوپیا، انڈونیشیا، عراق، اردن، مراکش، نائیجیریا، سوڈان، تیونس اور یمن کے شہریوں پر ہوگا۔

نئی پالیسی کی تفصیلات:

نئی پالیسی کے تحت اب سعودی عرب جانے کے خواہش مند افراد کو صرف سنگل انٹری ویزہ جاری کیا جائے گا، جو 30 دن کے لیے قابل استعمال ہوگا۔ ویزہ حاصل کرنے کے لیے درخواست دہندگان کو پاکستان میں اعتماد ویزہ سینٹرز پر بائیومیٹرک اور دیگر ضروری دستاویزات جمع کرانا ہوں گے۔

حج کوٹہ:

سعودی حکومت حج کوٹے کے مؤثر انتظام کے لیے سخت اقدامات کر رہی ہے، تاکہ ہر ملک کے لیے مختص حج کوٹے کی منصفانہ تقسیم کو یقینی بنایا جا سکے۔ سعودی وزارت حج و عمرہ نے حج 2025 کے لیے مقامی شہریوں اور رہائشیوں کے لیے رجسٹریشن کھول دی ہے اور خواہش مندوں کو نسک ایپ یا سرکاری ای پورٹل پر درخواست جمع کروانے کی ہدایت کی ہے۔