کراچی، شوہر کے ساتھ ڈکیتی کرنے والی خاتون گرفتار، کئی موبائل برآمد

شہر قائد کے علاقے کورنگی میں پولیس نے کارروائی کرتے ہوئے تین رکنی ڈکیت گروہ کو گرفتار کیا ہے جس میں میاں بیوی بھی شامل ہیں۔

کورنگی پولیس کے مطابق کارروائی پیر اور منگل کی درمیانی شب مخبر کی اطلاع پر کی گئی جس میں ایک خاتون اور دو ملزمان کو گرفتار کیا گیا۔

گرفتار خاتون کی شناخت افشاں کے نام سے ہوئی جو اپنے شوہر رضوان اور ساتھی اسد کے ساتھ ملکر ڈکیتی کی وارداتیں کرتی تھی۔ چھاپے کے دوران ملزمہ کے قبضے سے چھینے سے 6 موبائل فون اور دیگر سامان و نقدی برآمد ہوئی۔

پولیس کے مطابق تین رکنی گروہ منظم انداز سے کارروائی کرتا تھا، ایک موٹرسائیکل پر ملزمہ شوہر کے ساتھ بیٹھتی تھی جب کہ دوسرے پر اُس کا ساتھی ہوتا تھا۔ 

واردات کا طریقہ یہ تھا کہ خاتون اور شوہر مل کر کسی کو لوٹتے جبکہ ساتھی بیک اپ فراہم کرتا تھا جبکہ کئی وارداتوں میں افشاں اور شوہر نے ساتھی کو بیک اپ فراہم کیا ہے۔

گرفتار ملزمان نے شہر کے مختلف علاقوں میں درجن سے زائد وارداتوں کا اعتراف بھی کیا۔ پولیس افسر کے مطابق کئی روز سے اس گروہ کی شکایات اور اطلاعات موصول ہورہی تھیں اور بتایا گیا تھا کہ گینگ میں خاتون بھی شامل ہے۔

کئی عرصے بعد گرفتاری کے سوال پر پولیس افسر نے بتایا کہ خاتون کی ساتھ موجودگی کی وجہ سے متعدد مواقعوں پر یہ بچ گئے تھے کیونکہ اہلکار انہیں فیملی سمجھ کر چھوڑ دیتے تھے۔

پولیس کے مطابق ملزمان کے خلاف ٹھوس شواہد موجود ہیں، جبکہ خاتون سمیت تینوں ملزمان کا کریمنل ریکارڈ بھی چیک کیا جارہا ہے۔