مہناز شیخ کو ڈرامہ ان کہی میں کام کرنے کا کتنا معاوضہ ملا؟ اداکارہ نے بتادیا

پاکستانی شوبز انڈسٹری کی سینئر اداکارہ شہناز شیخ نے معروف ڈرامہ ان کہی میں ملنے والی فیس سے متعلق پہلی بار کھل کر گفتگو کی اور انہوں نے سوشل میڈیا کو بھی تنقید کا نشانہ بنایا ہے۔

برطانوی نشریاتی ادارے کو دیے گئے انٹرویو میں سینئر اداکارہ شہناز شیخ نے کہا کہ ہم نے جو کھلی ڈلی زندگی گزاری اُس کے بارے میں آج کے لوگ تو سوچ بھی نہیں سکتے، اس زندگی کی وجہ سوشل میڈیا کا نہ ہونا تھا اور میں شکر ادا کرتی ہوں کہ ہمارے دور میں سوشل میڈیا نہیں تھا۔

انہوں نے کہا کہ سوشل میڈیا کی وجہ سے ہر شخص بالخصوص معروف شخصیات کی پرائیوسی ختم ہوگئی ہے تاہم اس سے بھی کوئی انکار نہیں کہ سوشل میڈیا سے بہت معلومات ملتی ہے اور اس کے استعمال سے مزہ آتا ہے، میں تو اس کے بغیر نہیں رہ سکتی۔

شہناز شیخ نے معروف ڈرامے ’ان کہی‘ میں کردار پر ملنے والے معاوضے سے متعلق بتایا کہ ’مجھے ایک قسط کے 800 روپے ملتے تھے اور یہ اُس وقت کا سب سے زیادہ معاوضہ تھا‘۔

انہوں نے کہا کہ جب ان کہی مشہور ہوا تو پھر تنہائیاں ڈرامے میں میری فی قسط فیس میں 200 روپے اضافہ ہوا، ان پیسوں میں ہمیں کپڑے، میک اپ سمیت دیگر اخراجات خود ادا کرنے ہوتے تھے۔

سینئیر اداکارہ کا کہنا تھا کہ آج کل ڈراموں میں رونا دھونا دکھایا جاتا ہے اور ساس بہو کے درمیان تنازع دکھایا جاتا ہے۔ ایسا اس لیے ہے کیونکہ لوگ رونا دھونا دیکھنا چاہتے ہیں۔