سلمان خان کے بعد شاہ رخ خان کو بھی قتل کی دھمکی

ممبئی پولیس نے بالی ووڈ اداکار شاہ رخ خان کو دھمکی آمیز فون کال موصول ہونے کے بعد مقدمہ درج کرلیا ہے، دھمکی میں 50لاکھ روپے کا مطالبہ کیا گیا تھا اور متنبہ کیا گیا تھا کہ اگر رقم ادا نہ کی گئی تو جان سے مار دیا جائے گا۔

دھمکی آمیز کال 5نومبر کو دوپہر کے وقت کی گئی، کال مبینہ طور پر فیضان نامی نوجوان کی طرف سے کی گئی تھی جو چھتیس گڑھ کا رہائشی ہے۔

فیضان کے ایکٹو فون نمبر سے  کال ٹریس کی گئی اور دھمکی کے بعد ممبئی پولیس نے معاملے کی تحقیقات کے لیے ایک ٹیم رائے پور روانہ کی۔

یہ پہلا موقع نہیں جب خان کو دھمکیوں کا سامنا کرنا پڑا ہو۔ گزشتہ اکتوبر میں، اپنی فلموں پٹھان اور جوان کی کامیابی کے بعد، خان کو جان سے مارنے کی دھمکیاںمل چکی ہیں، جس کے بعد ان کی سیکورٹی کو مزید بڑھا دیا گیا تھا۔