آفاق احمد کو جوڈیشل ریمانڈ پرجیل بھیج دیا گیا

کراچی: مہاجر قومی موومنٹ (ایم کیو ایم) پاکستان کے چیئرمین آفاق احمد کو انسداد دہشتگردی منتظم عدالت میں پیش کردیا گیا۔

 انہیں سخت سیکیورٹی میں بکتر بند گاڑی کے ذریعے عدالت لایا گیا، جبکہ بڑی تعداد میں کارکنان بھی عدالت کے باہر موجود تھے اور نعرے بازی کرتے رہے۔

آفاق احمد پر الزام ہے کہ انہوں نے عوام کو اشتعال دلا کر کراچی میں ہیوی ٹریفک کے خلاف کارروائیوں پر اکسایا، جس کے نتیجے میں مال بردار گاڑیوں کو نذر آتش کیا گیا۔

پولیس کے مطابق، کورنگی میں ٹرک جلانے کے مقدمے میں انہیں گرفتار کیا گیا ہے، اور ان کے خلاف جلا ئوگھیرائو کی دفعات کے تحت مقدمہ درج کیا گیا ہے۔

کراچی کی انسداد دہشت گردی عدالت میں کورنگی میں ٹرک نذر آتش کرنے کے مقدمے کی سماعت کے دوران پولیس نے عدالت سے آفاق احمد کے چودہ روزہ جسمانی ریمانڈ کی استدعا کی، تاہم عدالت نے انہیں جوڈیشل ریمانڈ پر جیل بھیج دیا۔

سرکاری وکیل نے موقف اختیار کیا کہ آفاق احمد کے کہنے پر عوام نے مال بردار گاڑیوں کو آگ لگائی، جس کے باعث ٹینکر کمیونٹی انڈر تھریٹ ہے اور شہر میں خوف و ہراس پھیل چکا ہے۔

عدالت نے سوال اٹھایا کہ اس مقدمے میں دہشت گردی کی دفعات کیوں لگائی گئی ہیں؟ جس پر سرکاری وکیل نے جواب دیا کہ جلائو گھیرائو کی وجہ سے اے ٹی اے(انسداد دہشت گردی ایکٹ)کی دفعات شامل کی گئی ہیں۔