فلسطینیوں سے اظہار یکجہتی کیلیے سال نو کی تقاریب پر مکمل پابندی ہوگی، وزیر اعظم

نگراں وزیراعظم انوار الحق کاکڑ نے کہا ہے کہ فلسطینیوں سے اظہار یکجہتی کیلیے سال نو کی آمد پر کوئی تقریب نہیں ہوگی اور عوام بھی مکمل اظہار یکجہتی کیلیے جشن نہ منائیں۔

نگراں وزیراعظم انوار الحق کاکڑ نے جمعرات کے روز اپنے ایک بیان میں کہا کہ تمام پاکستانیوں سے گزارش ہے کہ وہ غزہ کے مظلوموں کے ساتھ اظہار یکجہتی کا مظاہرہ اور سال نو پر کسی بھی قسم کے جشن سے گریز کریں اور سادگی سے سال 2024 کو خوش آمدید کہیں۔

انہوں نے کہا کہ ’نہتے فلسطینی مظلوموں سے اظہار یکجہتی کیلیے حکومت کی طرف سے سال نو کے حوالے سے کسی بھی قسم کی تقریب پر مکمل پابندی ہوگی، یہ فیصلہ فلسطین کی تشویشناک صورت حال کو مدنظر رکھتے ہوئے کیا گیا ہے‘۔

وزیراعظم نے کہا کہ ’قابض اسرائیلی فورسز 7 اکتوبر کے بعد سے فسلطینیوں پرظلم و ستم کے پہاڑ توڑ رہی ہیں، اب تک وہاں پر بچوں سمیت 21 ہزار سے زائد نہتے شہری شہید ہوچکے ہیں، فلسطینیوں کی نسل کشی پر پاکستانی قوم اور پوری امت مسلمہ شدید رنج و غم میں ہے‘۔

Special Message of Caretaker Prime Minister Anwaar-ul-Haq Kakar. pic.twitter.com/d5LDESJ2P5

— Prime Minister's Office (@PakPMO) December 28, 2023

انوار الحق کاکڑ نے کہا کہ پاکستان غزہ میں جاری خون ریزی کو رکنے کے لیے عالمی فارمز پر آواز اٹھا رہا ہے اور یہ سلسلہ جاری رکھے گا جبکہ ہم نے فلسطینیوں کیلیے دو امدادی کھیپ بھیجیں ہیں اور تیسری جلد روانہ کریں گے۔

انہوں نے کہا کہ مصر اور اردن کے ساتھ مل کر پاکستان غزہ سے زخمیوں کے انخلا اور جنگ بندی کو روکنے پر بھی بات چیت کررہا ہے جبکہ مسلسل مذکورہ ممالک سے رابطے میں بھی ہے۔