جناح ہاؤس حملہ کیس : علیمہ خان اور عظمیٰ خان کو بڑا ریلیف مل گیا

لاہور:جناح ہاؤس حملہ کیس میں علیمہ خان اور عظمی خان کو بڑا ریلیف مل گیا، پولیس نے دونوں کوبے قصور قرار دے دیا۔

ذرائع کے مطابق انسداد دہشت گردی عدالت لاہور میں بانی چیئرمین پی ٹی آئی عمران خان کی بہنوں کے خلاف 9 مئی کے مقدمات میں عبوری ضمانتوں کی درخواست پر سماعت ہوئی۔

عدالت نے جناح ہاس حملہ کیس میں عبوری ضمانت واپس لینے کی بنا پر خارج کر دی ۔ دوران سماعت تفتیشی افسر نے عدالت کو بتایا کہ علیمہ خان اور عظمی خان کے خلاف تفتیش مکمل ہے۔ علیمہ خان اور عظمی خان جناح ہاس کیس میں بے قصور ہیں۔

علیمہ خان نے میڈیا سے گفتگو کرتے ہوئے کہا کہ 20 مہینے گزارنے کے بعد اللہ تعالی نے ہمیں سرخرو کیا۔ اس نظام کے حوالے سے بہت کچھ سیکھا ۔ کہا گیا کہ آپ 9مئی کے مقدمات میں مطلوب نہیں ۔ اللہ تعالی کسی دشمن کو بھی اس اذیت سے نہ گزارے۔

علیمہ خان نے کہا کہ تفتیشی افسر پہلے دن ہی پیش ہوجاتا تو شاید نوبت یہاں تک نہیں پہنچتی۔ ریکارڈ کی عدم دستیابی کے باعث 20 مہینے عدالتوں کے چکر لگانا پڑے۔ تفتیشی افسران کی غیرذمے داری کے باعث کئی لوگ پریشان ہوئے۔