لطیف کھوسہ نے تحریک انصاف میں شمولیت کا اعلان کر دیا

پاکستان پیپلزپارٹی کے سابق رہنما اور سینئر قانون دان لطیف کھوسہ نے بانی پی ٹی آئی کی خواہش پر پاکستان تحریک انصاف میں شمولیت کا اعلان کر دیا۔

لاہور میں میڈیا سے گفتگو کرتے ہوئے لطیف کھوسہ نے پی ٹی آئی میں شمولیت کا اعلان کیا۔انہوں نے کہا کہ پاکستان کے لیے محبت، امن اور بھائی چارے کے سفر کے آغاز کی دعوت دیتا ہوں، امید ہے نفرتوں کی سیاست ختم ہو گی۔

لطیف کھوسہ کا کہنا ہے کہ آئین ایسا عمرانی معاہدہ ہے جس میں تمام فلاحی مملکتوں کے خدوخال ہیں، جب جب آئین سے انحراف کیا ریاست اور آئین کو نقصان پہنچا۔سابق گورنر پنجاب نے کہا کہ وکالت ہو یا سیاست ہمیشہ عبادت سمجھ کر کی ہے، پہلی وفاداری دھرتی ماں سے ہے۔

ان کا مزید کہنا ہے کہ کہا گیا کہ لوگ پی ٹی آئی چھوڑ رہے ہیں تم پاگل ہو جو شامل ہوگئے، اگر یہ پاگل پن ہے تو ہاں میں پاگل ہوں۔ لطیف کھوسہ نے یہ بھی کہا کہ بانی پی ٹی آئی کی خواہش پر تحریک انصاف میں شمولیت اختیار کر رہے ہیں، فیصلہ ملک اور جمہوریت کے مفاد میں کیا ہے۔