سیکیورٹی فورسز کی کارروائی، 16 خوارج واصل جہنم

پاک-افغان سرحد کے ذریعے ملک میں دراندازی کی کوشش کرنے والے تمام 16 دہشت گردوں کو سیکیورٹی فورسز نے فوری اور موثر کارروائی کرتے ہوئے ہلاک کردیا۔

آئی ایس پی آر کے مطابق 22اور 23 مارچ کی درمیانی شب، شمالی وزیرستان کے علاقے غلام خان کلی میں پاکستان-افغانستان سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کو سیکیورٹی فورسز نے بروقت مانیٹر کیا۔

ترجمان پاک فوج کا کہنا تھا کہ پاک فوج کے جوانوں نے فوری اور مثر کارروائی کرتے ہوئے ان کی دراندازی کی کوشش کو ناکام بنایا۔

بیان کے مطابق شدید فائرنگ کے تبادلے کے نتیجے میں تمام 16 خوارج کو ہلاک کردیا گیا، پاکستان مسلسل عبوری افغان حکومت سے مطالبہ کر رہا ہے کہ وہ اپنی جانب سرحدی نگرانی کے مثر انتظامات یقینی بنائے۔

آئی ایس پی آر کے مطابق عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے، پاکستان کے خلاف دہشت گردی کے لیے افغان سرزمین کے استعمال کو روکے۔

ترجمان پاک فوج کاکہنا تھا کہ پاکستان کی سیکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پرعزم ہیں، ہر قیمت پر اس ناسور کو جڑ سے اکھاڑ پھینکنے کے لیے پر مکمل طور پر تیار ہیں۔