لیبیا کشتی حادثے کا مرکزی ملزم لاہور ایئرپورٹ سے گرفتار

لاہور: پولیس نے لیبیا کشتی حادثے کے مرکزی ملزم محمد اقبال کو لاہور ائیر پورٹ سے حراست میں لے لیا ہے۔

ذرائع کے مطابق ڈائریکٹر ایف آئی اے سرفراز ورک کا کہنا ہے کہ ملزم 2013 سے لیبیا میں مقیم تھا اور انسانی اسمگلنگ کا نیٹ ورک چلا رہا تھا، ملزم کے اکاؤنٹ سے 8 کڑور روپے کی غیر قانونی ٹرانزیکشنز بھی پکڑی گئی ہیں۔

ملزم کا نام بلیک لسٹ میں تھا اور اس کے خلاف  مختلف مقدمات درج تھے۔

ڈائریکٹر ایف آئی اے کے مطابق ملزم رقوم کی غیرقانونی ترسیل میں ملوث تھا، ملزم لیبیا سے انسانی اسمگلنگ کے نیٹ ورک میں رقوم کی ترسیل کرتا تھا۔

واضح رہے کہ جون 2023 میں یونان کے قریب لیبیا سے یونان جانے والے تارکین وطن کی کشتی ڈوب گئی تھی، حادثے میں ہلاک افراد میں 100 سے زائد پاکستانی بھی اپنی زندگیوں سے محروم ہوگئے تھے۔