میری ٹائم میوزیم میں ملازمت کرنے والی خاتون اغوا کے بعد قتل

 کراچی: میری ٹائم میوزیم میں ملازمت کرنے والی خاتون کو اغوا کے بعد قتل کر دیا گیا ، ملزمان نے ویڈیو بنا کر خاتون کے والد کو بھجوائی اورایک کروڑ تاوان مانگا تھا۔

تفصیلات کے مطابق کراچی کے علاقے فیڈرل بی ایریاکی رہائشی خاتون کی تشدد زدہ لاش سرجانی ٹائون سے مل گئی، خاتون کی گمشدگی کی رپورٹ مقتولہ کے شوہر نے یوسف پلازہ تھانے میں درج کرائی تھی۔

شوہر نے بتایا تھا کہ میں فیڈرل بی ایریا بلاک 16 کا رہائشی ہوں، میں اورمیری بیوی میری ٹائم میوزیم میں شاپ کیپر کی جاب کرتے ہیں، میری اہلیہ سحر فاطمہ کی ڈیوٹی دوپہر 3 سے رات 10 بجے تک ہے، اہلیہ ساڑھے 12 بجے دوپہر راشن لینے نکلی ، شام 6 بجے گھر پر رابطہ کیا بچوں نے بتایا والدہ واپس گھر نہیں پہنچی۔

مقدمے کے متن میں کہا گیا کہ رات 9 بجے میری سالی امبر نے بتایا سحر کے نمبر سے ویڈیو موصول ہوئی ہے، ویڈیو میرے سسر کے نمبر پر موصول ہوئی، سحر کے ہاتھ پائوں باندھے ہوئے اور منہ پر ٹیپ لگا ہوا تھا، ویڈیو میں اغوا کار کی آواز سنائی دے رہی تھی، ویڈیو میں نامعلوم شخص ایک کروڑ روپے تاوان کا مطالبہ کررہا تھا۔

مقدمہ درج ہونے کے بعدگزشتہ روزپولیس نے ٹیکنیکل بنیادوں پرخاتون کی لاش برآمد کی ، پولیس نے بتایا کہ مقتولہ سحر فاطمہ کو تشدد کر کے قتل کیا گیا۔حکام کے مطابق ویڈیو بھیج کر خاتون کے اہلخانہ سے 1 کروڑ تاوان مانگا گیا تھا۔