حارث رؤف نے چیمپئنز ٹرافی کھیلی تو۔۔۔ عامر نے خطرناک پیش گوئی کردی

پاکستان کرکٹ ٹیم کے سابق فاسٹ بولر محمد عامر نے حارث رؤف کی انجری کے بارے میں قومی ٹیم کو خبردار کیا ہے۔

انہوں نے کہا کہ اگر حارث رؤف انجری سے مکمل طور پر صحت یاب نہیں ہوئے تو انہیں چیمپیئنز ٹرافی میں شامل کرنا خطرناک ہو سکتا ہے۔

محمد عامر نے اپنے انٹرویو میں کہا کہ محض تین میچز کے لیے کھلاڑی کے کیرئیر کو خطرے میں ڈالنا دانشمندانہ فیصلہ نہیں ہوگا، کیونکہ انجری کے ساتھ وہ اپنی بہترین کارکردگی نہیں دکھا سکیں گے۔

عامر نے بتایا کہ اگر حارث رؤف کو سائیڈ اسٹرین انجری ہوئی ہے تو وہ چھ ہفتوں سے پہلے مکمل طور پر ٹھیک نہیں ہو سکتے۔

انہوں نے کہا کہ اگر انجری پہلے یا دوسرے درجے کی ہے تو صحت یاب ہونے میں کم از کم چھ ہفتے درکار ہوں گے۔

یاد رہے کہ سہ ملکی سیریز کے پہلے میچ میں حارث رؤف بولنگ کے دوران زخمی ہو گئے تھے اور صرف 6.2 اوورز ہی کر پائے تھے، جس کے بعد انہیں سیریز سے باہر ہونا پڑا۔ اب ان کی چیمپیئنز ٹرافی میں شرکت مشکوک لگ رہی ہے۔