ایشیا کپ سپر فور، پاک-بھارت میچ میں بھی اینڈی پائیکرافٹ ریفری مقرر

دبئی: ایشیا کپ کے گروپ میچ میں متنازع فیصلے کے باعث توجہ کا مرکز بننے والے ریفری اینڈی پائیکرافٹ کو پاکستان اور بھارت کے درمیان سپر فور کے دوسرے میچ کے لیے بھی میچ ریفری مقرر کر دیا گیا ہے۔

کرک انفو کے مطابق، یہ اہم میچ کل (اتوار، 21 ستمبر) دبئی میں کھیلا جائے گا۔ یاد رہے کہ 14 ستمبر کو گروپ میچ کے دوران دونوں ٹیموں کے کھلاڑیوں اور کپتانوں نے ٹاس کے موقع پر ایک دوسرے سے ہاتھ ملانے سے گریز کیا تھا، جس پر تنازع کھڑا ہوگیا تھا۔

پاکستانی ٹیم مینجمنٹ کا مؤقف تھا کہ اینڈی پائیکرافٹ نے قومی کپتان سلمان آغا کو بھارتی کپتان سے ہاتھ ملانے سے روک دیا تھا، جس پر پاکستان کرکٹ بورڈ (پی سی بی) نے شدید احتجاج کرتے ہوئے آئی سی سی سے ان کی معطلی کا مطالبہ کیا اور متحدہ عرب امارات کے خلاف میچ کے بائیکاٹ کی دھمکی بھی دی تھی۔

تاہم بعد ازاں پائیکرافٹ نے پاکستانی کپتان سے معافی مانگی، جس کے بعد پاکستان نے یو اے ای کے خلاف میچ کھیلا۔

اس دوران ٹیم انتظامیہ نے بھارت سے ہونے والے میچ سے قبل پریس کانفرنس منسوخ کردی ہے اور کھلاڑیوں کی ذہنی دباؤ کم کرنے کے لیے ایک ماہرِ نفسیات کی خدمات حاصل کرلی ہیں۔