ڈاکٹرز نے ٹرمپ کی صحت سے متعلق رپورٹ جاری کردی

فلوریڈا: ڈاکٹرز نے امریکی صدر ڈونلڈ ٹرمپ کی ذہنی اور جسمانی صحت کے معائنے کے بعد رپورٹ جاری کردی۔

سی این این کے مطابق صدر ڈونلڈ ٹرمپ اپنے سالانہ طبی معائنے کے بعد "مکمل طور پر صدارتی فرائض انجام دینے کے قابل" ہیں۔ وائٹ ہاؤس کے ڈاکٹر نے ان کی طبی رپورٹ جاری کرتے ہوئے ان کی صحت کو "بہترین" قرار دیتے ہوئے گولف مقابلوں میں ان کی کامیابیوں کو ان کی تندرستی کی دلیل بتایا۔  

78 سالہ ٹرمپ کا وزن 224 پاؤنڈ (تقریباً 102 کلوگرام) اور قد 75 انچ (6 فٹ 3 انچ) ہے۔ ان کا بلڈ پریشر 128/74 mmHg ہے جو معمول سے قدرے زیادہ ہے، جبکہ دل کی دھڑکن 62 فی منٹ ہے۔ 2020 کے مقابلے میں ان کا وزن 20 پاؤنڈ کم ہوا ہے۔  

صدر ٹرمپ نے "مونٹریال کوگنیٹو اسسمنٹ" ٹیسٹ میں 30 میں سے 30 نمبرز حاصل کیے، جس پر انہوں نے خود کو "ہر سوال کا صحیح جواب دینے پر" فخر کا اظہار کیا۔

معائنے میں ان کے دل، پھیپھڑوں اور اعصابی نظام کی کارکردگی بھی بہترین پائی گئی۔   وائٹ ہاؤس کے ڈاکٹر ڈاکٹر شان باربیبیلا نے کہا کہ گزشتہ سال پنسلوانیا میں قاتلانہ حملے کے نتیجے میں ٹرمپ کے دائیں کان پر نشانات موجود ہیں۔

انہوں نے صدر کی فعال طرزِ زندگی کو ان کی صحت کا اہم سبب قرار دیتے ہوئے ان کی میٹنگز، تقریبات اور گولف مقابلوں میں کامیابیوں کا حوالہ دیا۔  

رپورٹ کے مطابق، گزشتہ سال کی کولونوسکوپی میں ٹرمپ کو "ڈائیورٹیکولائٹس" (آنتوں کی سوزش) کی تشخیص ہوئی تھی، جو عام طور پر بے ضرر ہوتی ہے۔ ان کی آنکھوں کے موتیے کا آپریشن بھی ہوچکا ہے، لیکن اس کی تفصیلات نہیں بتائی گئیں۔  

ڈاکٹرز نے رپورٹ میں لکھا کہ "صدر ٹرمپ کی ذہنی اور جسمانی صحت بہترین ہے اور وہ کمانڈر ان چیف اور ریاست کے سربراہ کے فرائض بخوبی انجام دینے کے قابل ہیں۔"