خلا میں پھنسے خلا بازوں کا واپسی کا سفر شروع، تاریخ سامنے آگئی

نیویارک: ناسا نے تصدیق کی ہے کہ گزشتہ برس جون سے خلا میں پھنسے ہوئے خلا بازوں کو ریسکیو کر لیا گیا ہے، اب ان کی واپسی کا سفر شروع ہو گیا ہے۔

غیرملکی خبررساں ادارے کے مطابق اسپیس ایکس کا ڈریگن کیپسول جو ناسا کے کریو- 10 مشن کو انجام دے رہا ہے، 15 مارچ کو لانچ ہونے کے بعد 29 گھنٹوں کا سفر مکمل کر کے گزشتہ روز پاکستانی وقت کے مطابق صبح 9 بجے بین الاقوامی خلائی اسٹیشن (آئی ایس ایس)پہنچ گیا ہے۔

ناسا کے کریو-10 مشن کے تحت 4 خلا بازوں کو آئی ایس ایس بھیجا گیا ہے جو خلا میں پھنسے 58 سالہ سنیتا ولیمز اور 62 سالہ بوچ ولمور کو بحفاظت واپس زمین پر لائیں گے۔

کریو-10 مشن کے تحت جن 4 خلا بازوں کو آئی ایس ایس بھیجا گیا ہے ان میں ناسا کے این میک کلین اور نکول آئرس، جاپان کے تاکویا اونیشی اور روس کے کریل پیسکوف شامل ہیں۔

ناسا نے تصدیق کی ہے کہ اسپیس ایکس کا ڈریگن کیپسول خلا میں پھنسے ہوئے خلا بازوں سنیتا ولیمز اور بوچ ولمور کو 19 مارچ کو زمین پر واپس لے کر آئے گا، جو اسٹار لائنر خلائی جہاز میں تکنیکی خرابی کی وجہ سے گزشتہ ساڑھے 9 ماہ سے خلا میں پھنسے ہوئے ہیں۔