مصطفی قتل کیس، ملزم ارمغان کے حوالے سے ایف آئی اے کا پولیس کے بیانات لینے کا فیصلہ

کراچی: ڈیفنس سے اغوا کے بعد بے دردی سے قتل ہونے والے مصطفی قتل کیس میں ایک اہم پیشرفت سامنے آئی ہے۔

تفصٰلات کے مطابق وفاقی تحقیقاتی ایجنسی (ایف آئی اے) نے سندھ پولیس کو ایک خط لکھ کر ارمغان کی گرفتاری کے حوالے سے وضاحت طلب کی ہے۔

ذرائع کے مطابق ایف آئی اے نے فیصلہ کیا ہے کہ ارمغان کے گھر پر چھاپہ مارنے والی پولیس ٹیم اور تمام اہلکاروں  کے بیانات قلمبند کیے جائیں گے، تاکہ معاملے کی گہرائی تک پہنچا جا سکے۔  

ایف آئی اے کی ٹیم تمام متعلقہ پولیس اہلکاروں کے بیانات لے گی تاکہ کیس کے تمام پہلوؤں کا جائزہ لیا جا سکے۔ اس سلسلے میں ایف آئی اے جلد ہی ارمغان کے بنگلے کا دورہ کرے گی اور وہاں سے مزید شواہد جمع کرے گی۔  

ذرائع کے مطابق ایف آئی اے ارمغان اور اس سے منسلک افراد کا ڈیٹا بھی اکٹھا کر رہی ہے تاکہ تحقیقات کو مزید مؤثر بنایا جا سکے۔ اس پیش رفت کے بعد کیس میں مزید نئے انکشافات کی توقع کی جا رہی ہے۔  

یہ اقدامات مصطفی قتل کیس کی تحقیقات کو تیز کرنے اور مجرمان کو انصاف کے کٹہرے میں لانے کی کوششوں کا حصہ ہیں۔ ایف آئی اے کا کہنا ہے کہ وہ تمام شواہد اور بیانات کی بنیاد پر کیس کو آگے بڑھائے گی۔